Motivational Interviewing

MI – Allannguinissamik nukissaninneq

Inuuninni allannguerusukkaluarlutit kajumissuseqanngilit? Imaassinnaavoq qanoq iliuuseqarnissaq ilisimagaluarit kisiannili aallatinniarneq ajornartorsiutigalugu, imal qanoq ilioruit ajunnginnerussasoq nalornissutigalugu.
Motivational Interviewing (MI) pillugu ilitsersuisarpunga, peqataasut kinguneqarluartumik oqaloqatigiissinnaanissaannut sakkussanik tunioraasarlunga. Peqataasut suleqatigalugit saqqummiinerit, suliffik sulisorluunniit tunngavingalugu misileraanerit taavalu case-nik misissuinerit atorlugit tunngaviusumik siunertat iliuutsillu pissarsiarissavaat, ilaatigut eqqumaffigalugu tusarnaarneq, misigeqataaneq taavalu isummanik paatitsineq qanoq isumagineqarsinnaanera.

Peqqinnissaqarfimmi, inunnik isumaginniffimmi ilinniartitsisutulluunniit suliguit, qanorluunniit una ingerlariuseq atorlugu isumalimmik allannguinissamik suliaqarnermi iluaqutigissavat.
Kajumissuseq pillugu oqaloqatiginninnermi “qanoq iliorneruma iluarnerussava” tunngaviginngilaa. Sunali pingaaruteqarnerunersoq nassaarinissaa taavalu allannguiniarnermi piginnaasatit isumalluutigalugit qanoq kissaatigisat pilersissinnaanerlugu suliarissavarput. Sullitaq peqatigalugu anguniagai suliarineqartarput taamaasillugulu ajornartorsiutaasinnaasut aporfiusinnaasut misissorneqarlutik. MI ima ikiuutaasinnaavoq pingaartitatit ersarinnerulersillugit aamma iluattitsisinnaanerit upperineruleqqillugu.

Oqaloqatigiinnerit assigiinngitsuni atorneqarsinnaavoq. Peqqinnarnerusumik inuuneqalernissaq sammineqarsinnaavoq, atorfimmi angusaqarluarnissaq imal ileqquliussimasaq qimanniarnera aamma sammineqarsinnaavoq. Sunaluunniit sammerusukkukku MI atorlugu sulinermi ilinnut tulluartumik iluaqutissanik ujartuineq sulissutigineqartarpoq.

Allannguiniarlutit alloriarnissat piareersimaffigigukku, ikiuinissannut piareersimavunga. Ullumikkut attaviginnga taava qanoq tapersersorsinnaanerlutit paasiniassavarput.